酒後頭痛有得救?

大家有冇試過飲完酒冇幾耐就開始頭痛?雖然只係飲咗一小杯都中招,係唔係啲酒有問題?今日講個故事俾大家聽,有個任何香薰書都冇教嘅方法可能幫到你!🥰

話說尋晚Zaza老師同朋友食飯,飲咗兩杯白葡萄酒,返到屋企覺得非常頭痛,臨瞓前想搵啲嘢舒緩吓,於是查看資料睇吓點解飲酒會頭痛。發現紅酒🍷、白酒同啤酒🍻入面有兩樣天然成份會引起頭痛,一樣係組織胺Histamine,另一樣係酪胺酸Tyramine,兩種成份都係喺發酵時自然產生,所以同酒嘅質量冇關。哩兩樣成份亦會喺其他食物裡面存在,例如芝士、朱咕力、肉類、其他發酵食物等,部分偏頭痛患者食完哩啲食物之後會引發或加劇頭痛。

組織胺會令血管擴張,令血管滲出性增加,令液體從血液內流出至組織。有人試過服用抗組織胺藥物(即係平時我哋可以買到嘅敏感藥),可以解決酒後頭痛嘅問題。既然係咁,我就試吓用最強嗰種抗組織胺精油嚟做個實驗!搽咗兩滴檀香精油喺腳板底,同時薰香,另外放咗最佳頭痛晶石紫水晶喺枕頭上。如果用1-10級嚟評分,1係最小痛,10係最強痛,原本嘅頭痛係8級痛,而且敲個頭時覺得裡面好似裝咗水,有啲液體喺裡面搖下搖下咁。用完檀香之後大概15-20分鐘,明顯冇咗水浸嘅感覺,頭痛減輕到2級痛,非常有效。頭痛嘅原因有過百種,正如其他身體問題一樣,每個人情況都唔同,所以唔會有一個萬能嘅方法或配方。好多學香薰治療嘅同學一聽到要考解剖生理學就嚇到雞飛狗走,但係如果你連最基本嘅生理知識都冇,又點樣去做治療呢?一味死背邊種油有咩功效而完全唔理解背後機制,就永遠唔可以靈活運用,發揮精油最大作用。

#Phytospa #酒後頭痛 #偏頭痛 #香薰 #香薰治療 #檀香 #精油 #紫水晶