原本淨係諗住返舖頭攞少少嘢，然後見到啲精油又好想調香，我諗我已經中毒太深冇得救喇！
仲考慮緊開唔開香水5級導師課程，暫時度到個期由21/3至1/4逢星期一至五共10天，已經上完3級嘅同學如果想上5級，見字請聯絡灣仔同事統計人數。
用全精油嚟調香易學難精，話易嘅你自己隨意攞幾支精油，有齊高中低音，溝埋一齊就可以整到支香水出嚟。難就難在要做出有層次、有深度、又討人歡喜的味道，選材係關鍵！就算同一種精油，唔同供應商出產氣味都可以好大差異，如果冇足夠嘅調香基礎，同氣味分析能力，係好難拿捏得準確。
平時我自用嘅精油大概有200-300種，同一植物品種都會有幾支唔同來源，根據氣味特性同化學成份，有啲我淨係會用嚟做香薰治療，有啲淨係會用嚟調香。
同學經常都問上香水堂係咪全部都用精油，我嘅答案係唔會。原因係一種精油裡面有過百種芳香份子，你一種都唔識又唔肯去學，點會調得出有質素嘅香水？如果我問你香葉醇係咩味你答唔答得出？可能你睇書會睇過，但係你有冇真係聞過？然後如果我教你，要調某種香味就要睇某種精油嘅香葉醇含量有幾多%，你估你學唔學得識？所以如果你淨係想學用邊幾種精油可以溝到一支香水出嚟的話，我哋個證書課程係唔啱你上嘅。
其實要教的話，真係好多嘢可以教，加上調香係必須要實踐，落手去做調配先可以學得識，淨係齋聽書係永遠冇辦法學好，10日時間其實真係好短，希望我哋可以係最有限嘅時間裡面發揮最大學習效果。